മുഹമ്മദ് ഷമി രാജസ്ഥാനില്‍, സാം കറന്‍ ലഖ്‌നൗവില്‍

ഐപിഎല്‍ ക്രിക്കറ്റില്‍ വമ്പന്‍ ട്രേഡ്, ഷമിയെ സ്വന്തമാക്കിയത് 8 കോടി രൂപയ്ക്ക്

വരാനിരിക്കുന്ന 2027 ഇന്ത്യന്‍ പ്രീമിയര്‍ ലീഗ് സീസണില്‍ വലംകൈയ്യന്‍ പേസര്‍ മുഹമ്മദ് ഷമി രാജസ്ഥാന്‍ റോയല്‍സിനായി കളിക്കും. ലഖ്നൗ സൂപ്പര്‍ ജയന്റ്‌സില്‍ നിന്നുള്ള ട്രേഡിലൂടെയാണ് താരം രാജസ്ഥാനിലേക്ക് എത്തുന്നതെന്ന് ഐ.പി.എല്‍ ഔദ്യോഗിക പ്രസ്താവനയില്‍ അറിയിച്ചു. 10 കോടി രൂപയ്ക്ക് എല്‍.എസ്.ജി സ്വന്തമാക്കിയ ഷമി, പുതുക്കിയ പ്രതിഫലമായ 8 കോടി രൂപയ്ക്കാണ് രാജസ്ഥാന്‍ റോയല്‍സിലേക്ക് മാറുന്നത്.

ഇടംകൈയ്യന്‍ സ്പിന്നര്‍ എം. സിദ്ധാര്‍ത്ഥും നിലവിലെ പ്രതിഫലമായ 75 ലക്ഷം രൂപയ്ക്ക് എല്‍.എസ്.ജിയില്‍ നിന്ന് രാജസ്ഥാന്‍ റോയല്‍സിലേക്ക് മാറും. രാജസ്ഥാന്റെ ബൗളിങ് നിരയ്ക്ക് സിദ്ധാര്‍ത്ഥ് കൂടുതല്‍ കരുത്തേകും. അതേസമയം, ഓള്‍റൗണ്ടര്‍ സാം കറന്‍ നിലവിലെ പ്രതിഫലമായ 2.4 കോടി രൂപയ്ക്ക് രാജസ്ഥാന്‍ റോയല്‍സില്‍ നിന്ന് എല്‍.എസ്.ജിയിലേക്ക് ചേക്കേറി.

2026 സീസണില്‍ 9.00 ഇക്കോണമി നിരക്കില്‍ 13 മത്സരങ്ങളില്‍ നിന്ന് 12 വിക്കറ്റുകള്‍ മാത്രമാണ് നേടിയതെങ്കിലും, 36-കാരനായ ഷമി എല്‍.എസ്.ജിയുടെ ബൗളിംഗ് നിരയ്ക്ക് മികച്ച അനുഭവസമ്പത്തും ആഴവും നല്‍കിയിരുന്നു. കഴിഞ്ഞ സീസണില്‍ സണ്‍റൈസേഴ്‌സ് ഹൈദരാബാദിനെതിരെ 9 റണ്‍സ് മാത്രം വഴങ്ങി 2 വിക്കറ്റ് വീഴ്ത്തിയ മികച്ച സ്‌പെല്ലിലൂടെ തന്റെ മാച്ച് വിന്നിംഗ് മികവ് അദ്ദേഹം തെളിയിച്ചിരുന്നു. അടുത്തിടെയാണ് ഷമി ടെസ്റ്റ് ക്രിക്കറ്റില്‍ നിന്ന് വിരമിച്ചത്. ഇതുവരെ 132 ഐ.പി.എല്‍ മത്സരങ്ങളില്‍ നിന്നായി 145 വിക്കറ്റുകള്‍ ഈ വലംകൈയ്യന്‍ പേസര്‍ നേടിയിട്ടുണ്ട്. കഴിഞ്ഞ സീസണില്‍ രാജസ്ഥാന്റെ പ്രധാന സ്‌ട്രൈക്ക് ബൗളറായിരുന്ന ജോഫ്ര ആര്‍ച്ചര്‍ക്കൊപ്പമായിരിക്കും ഷമി ഇനി പന്തെറിയുക.

മറുവശത്ത്, സാം കറന്റെ വരവ് എല്‍.എസ്.ജിയുടെ ബാറ്റിംഗ് നിരയെ ശക്തിപ്പെടുത്താനും മത്സരത്തിന്റെ വിവിധ ഘട്ടങ്ങളില്‍ പന്തെറിയാനും കഴിവുള്ള ഒരു മികച്ച ഓള്‍റൗണ്ടറെയാണ് ടീമിന് നല്‍കുന്നത്. ഐ.പി.എല്‍ കരിയറില്‍ ഇതുവരെ 59 വിക്കറ്റുകളും 997 റണ്‍സും അദ്ദേഹം നേടിയിട്ടുണ്ട്. പന്തുകളിലെ വൈവിധ്യത്തിനും സമ്മര്‍ദ്ദഘട്ടങ്ങളില്‍ മികച്ച പ്രകടനം കാഴ്ചവെക്കാനുള്ള കഴിവിനും പേരുകേട്ട കറന്‍, ടീമിന് മികച്ച ആഴവും വൈവിധ്യവും നല്‍കുന്നു. 2022 ടി20 ലോകകപ്പില്‍ ഇംഗ്ലണ്ട് കിരീടം നേടിയപ്പോള്‍ ടൂര്‍ണമെന്റിലെയും ഫൈനലിലെയും താരമായി തിരഞ്ഞെടുക്കപ്പെട്ട കറന്‍, എല്‍.എസ്.ജിയുടെ ക്യാപ്റ്റന്‍ സ്ഥാനത്തേക്കും പരിഗണിക്കപ്പെടാന്‍ സാധ്യതയുണ്ട്. 2026 സീസണിന് ശേഷം റിഷഭ് പന്ത് സ്ഥാനമൊഴിയുകയും തുടര്‍ന്ന് ട്രേഡിലൂടെ ഡല്‍ഹി ക്യാപിറ്റല്‍സിലേക്ക് മാറുകയും ചെയ്തതോടെയാണ് എല്‍.എസ്.ജിയുടെ ക്യാപ്റ്റന്‍ സ്ഥാനം ഒഴിഞ്ഞുകിടക്കുന്നത്.

content highlights: Mohammed Shami and M. Siddharth Traded to Rajasthan Royals; Sam Curran Joins LSG

To advertise here,contact us